आवर्तः ५०६ – *१ साहित्यादितात्पर्यनिश्चयपूर्वकः तर्कदृष्टेः सारग्राही निश्चयः

मम्मटभट्टादिकृताः साहित्यग्रन्थाः कामशास्त्रेऽन्तर्भवन्ति। काव्येषु *२ केषाञ्चित् कामशास्त्रेऽन्तर्भावः केषाञ्चित् *३ धर्मशास्त्रे। इत्थमष्टादशापि विद्यास्थानानि ब्रह्मात्मैकत्वज्ञानसम्पादनद्वारा मोक्षहेतुभूतानि। कानिचित् *४ साक्षात् कानिचित्परम्परया। अयमेव सर्वशास्त्राणामभिप्राय इति तर्कदृष्टिर्निश्चिकाय। यद्यप्युत्तरमीमांसां विना सर्वाण्यपि शास्त्राणि मुमुक्षुणा जिज्ञासुना सुतरां परित्यज्यानीति शारीरकमीमांसासूत्रतद्भाष्यकारादिभिः प्रतिपादितम्। तथापि उक्तेन नयेन तान्यपि कथमपि तत्रोपयुज्यन्त इति सूक्ष्मदृष्ट्या तर्कदृष्टिरेवं निश्चिकाय।