शिष्यः पृच्छति स्वामिन्, सामान्यज्ञानानन्तरं हि विशेषजिज्ञासा भवति। यथा ‘ब्राह्मणोऽयम्’ इति सामान्यतो ज्ञाते तदनन्तरं ‘सारस्वतोऽयम्, द्राविडोऽयम्’ इति विशेषज्ञानमुदेति तथा लक्षणायाः सामान्यस्वरूपज्ञानानन्तरमेव जहत्यादिविशेषस्वरूपज्ञानाकाङ्क्षा भवेत्। लक्षणायाः सामान्यज्ञानं विना जहत्यादिविशेषज्ञानं न संभवेत्। तस्माल्लक्षणायाः सामान्यस्वरूपं प्रदर्शयित्वा ततो जहत्यादिविशेषस्वरूपं तत्तल्लक्षणादिवर्णनपूर्वकं बोधयन्तु भवन्त इति।