योऽल्पज्ञोऽल्पशक्तिमान् पराधीनश्च स जीव इत्यभिधीयते। यद्यप्यल्पज्ञत्वादयो जीवे परमार्थतो न सन्ति। तथाप्यविद्याकृतमिथ्याभूतकिञ्चिज्ज्ञत्वादयो जीवे प्रतीयन्ते। अतस्ते किञ्चिज्ज्ञत्वादयो जीवे व्यपदिश्यन्ते। अविद्याकृतकिञ्चिज्ज्ञत्वादिभ्रान्तिरेव जीवत्वनिमित्तम्। सा चाल्पज्ञत्वादिभ्रान्तिरीश्वरे नास्ति। किन्तु मायाकृतसर्वज्ञत्वादय ईश्वरे सन्ति। अयमर्थः सविस्तरमुत्तरत्र प्रतिपादयिष्यते।

एवं च जगतः कर्ता न जीवः। किन्त्वीश्वर एव।