तत्र निर्गुणवस्तुनिर्देशरूपमङ्गलं यथा —

परिपूर्णं चिदानन्दं बुद्धिसाक्षि यदद्वयम्।
सूर्यादिभासकं नित्यं तेजः शुद्धं तदस्म्यहम्॥

सगुणवस्तुनिर्देशरूपमङ्गलं यथा –

विघ्नाः समूलं नश्यन्ति यन्नामोच्चारणात्सकृत्।
*१ त्रिपुरघ्नोऽपि यं स्मृत्वा जघान त्रिपुरासुरान्॥

विना तु येन देवाश्च स्वेप्सितं नाप्नुवन्ति हि।
सर्वविघ्नविनाशाय चिद्गणेशं नमामि तम्॥

नमस्काररूपमङ्गलं यथा –

असुराणां निहन्तारं त्रातारं सुरचेतसाम्।
रमाकान्तमुमाकान्तं नमाम्यनिशमद्वयम्॥

गुरोः स्ववाञ्छितप्रार्थनरूपमाशीर्वादमङ्गलम् –

यया शक्त्या देवदेवो जगत्सृष्ट्यादिकर्मकृत्।
सा मे तिष्ठतु वाक्पीठे ग्रन्थस्यास्य समाप्तये॥

शिष्यस्य स्ववाञ्छितप्रार्थनरूपमङ्गलम् –

संसारबन्धसंशान्त्या निजानन्दप्रकाशनात्।
निवर्तयतु जन्मादिदुःखं शिष्यस्य मे गुरुः॥