यथा सर्वस्वरूप ओङ्कारः। तथा सर्वस्वरूपं ब्रह्म। तस्मादोङ्कारो ब्रह्मरूपः। अथवा ओङ्कारो ब्रह्मणो वाचकः। ब्रह्म ओङ्कारस्य वाच्यम्। वाच्यवाचकयोरभेदोऽस्ति। तस्मादप्योङ्कारो ब्रह्मरूपः। किञ्च विचार्यमाणे यदक्षरं ब्रह्मण्यध्यस्तं तस्य ब्रह्माधिष्ठानं भवति। अध्यस्तस्य स्वरूपमधिष्ठानान्नातिरिच्यते। तस्मादप्योङ्कारो ब्रह्मैव। तस्मादोङ्कारं ब्रह्मरूपेण चिन्तयेत्।