साङ्ख्यशास्त्रप्रणेतृकपिलमतानुसारिणस्तु तृतीयं शब्दमपि प्रमाणत्वेनाङ्गीकुर्वन्ति। तथा हि, देशान्तरे कस्यचित् पिता मृतः। आप्तः कश्चित्तं वृत्तान्तं तत्पुत्रायाचख्यौ। आप्तवाक्यात् पुत्रः पितृमरणं निश्चिनोति। तच्च न स्यात् प्रत्यक्षानुमानात्मकप्रमाणद्वयमात्राङ्गीकारे; देशान्तरोत्पन्नपितृमरणज्ञानस्य प्रत्यक्षानुमानाभ्यामसंभवात्। तस्मात् कपिलमतानुसारिणः प्रत्यक्षानुमानशब्दात्मकं त्रयमपि प्रमाणत्वेनाङ्गीकुर्वन्ति।