सा इन्द्रेण पृष्टा उमा ब्रह्म देशकालवस्तुपरिच्छेदशून्यं भवतां विजयकारणं इति अनेन प्रकारेण ह किल उवाच इन्द्रं प्रत्युक्तवती। ब्रह्मेति नामधेयमुक्त्वा तस्य महिमानमप्याह – ब्रह्मणः उक्तलक्षणस्य वै प्रसिद्धस्य एतद्विजये ब्रह्मकर्तृकासुरपरिभवलक्षणो विशेषेण जये सति महीयध्वं स्तुतिपूजादिलाभरूपं महत्त्वं यूयं प्राप्नुथ स्वातन्त्र्याभिमानं मा कुरुत। इति एवमुमयोक्तः इन्द्रः ह किल तत एव उमावचनादेव विदाञ्चकार ज्ञातवान् न तु स्वतः | तज्ज्ञानप्रकारमाह – ब्रह्मेति ब्रह्म यद्यक्षमन्तर्हितं *१ तद्ब्रह्म, इति एवं ज्ञातवानित्यर्थः॥२६॥१॥