एवमग्निं स्तुत्वा मृत्युः स्वशिष्यायोवाचेति श्रुतिराह –

तं प्रकृं अग्निं लोकानां पृथिव्यादीनां आदिं प्रथमशरीरिणं विराट्स्वरूपं तस्मै नचिकेतसे मृत्युर्यम उवाच उक्तवान्। किञ्च या इष्टकाः चेतव्या इष्टका यादृशरूपाः यावतीः यत्संख्याकाः यथा वा येन प्रकारेणाग्निः चीयते न्यस्यते तत्सर्वमुक्तवानित्यर्थः। स च नचिकेता अपि यथोक्तं यथा मृत्युना उक्तं तत् प्रत्यवदत् स्वस्य ग्रहणशक्तिमावेदयितुमन्ववदत्। अथ अनुवादानन्तरं अस्य नचिकेतसोऽनुवादेन तुष्टः प्रसन्नः सन् मृत्युः अयाचितं वरं दातुकामः पुनरेवाह नचिकेतसं प्रत्युक्तवानित्यर्थः॥१४॥