एवंगुणवतः स्वर्गस्य साधनमग्निं च जानासि, तं मां प्रति कथयेत्याह –

स्वर्ग्यं स्वर्गप्राप्तिसाधनभूतं अग्निं सः सर्वलोकप्रसिद्धो मृत्युः त्वं अध्येषि जानासि हे मृत्यो। तं अग्निं श्रद्दधानाय श्रद्धावते मह्यं प्रब्रूहि प्रकर्षेण इतिकर्तव्यताद्यङ्गवैशिष्ट्यरूपेण कथय येन चितेनाग्निना स्वर्गलोकाः स्वर्गो लोको येषां ते स्वर्गलोकाः कर्मिणः अमृतत्वं अमरत्वं भजन्ते प्राप्नुवन्ति एतत् अग्निविज्ञानं द्वितीयेन वरेण वृणे प्रार्थये॥१२॥