स्वर्गसाधनमग्निं प्रष्टुकामो नचिकेताः स्वर्गस्वरूपं तावदाह –

स्वर्गपदेनात्र स्वर्लोकादिब्रह्मलोकान्तलोकसमुदायो विवक्षितः। तत्र स्वर्गे लोके गतस्याधिकारिणः किञ्चन किञ्चित् भयं रोगादिजन्यं नास्ति न विद्यते। तत्र स्वर्गे त्वं मृत्युर्न सहसा प्रभवसीति शेषः। अतो जरया जरावस्थया युक्तः पुरुषस्त्वत्तो न बिभेति भयं न प्राप्नोति। अशनायापिपासे क्षुधातृषे उभे तीर्त्वा अतिक्रम्य शोकातिगः मानसदुःखरहितः सन् स्वर्गलोके मोदते आनन्दं प्राप्नोतीत्यर्थः॥११॥