एवमुक्तेन पित्रा प्रेषितो नचिकेताः पितृभक्त्यादिप्रभावात् सशरीरो यमालयं गत्वा यमं च देशान्तरगतं श्रुत्वा पितृदत्तं मां यमो गृह्णीयादित्येतन्निमित्तं दिनत्रयं तत्रोपवासं कृतवान्। ततो देशान्तरादागतं यमं तदीया मन्त्रिण ऊचुरित्याह –

विवस्वतः सूर्यस्यापत्यं वैवस्वतः हे वैवस्वत यम। अतिथिर्ब्राह्मणो वैश्वानरो ऽग्निः सन् गृहान् प्रविशति। तस्य अतिथेः एतां पाद्यासनादिरूपां शान्तिं कुर्वन्ति शिष्टजनाः। अतस्त्वमपि नचिकेतसे पादप्रक्षालनार्थं उदकं जलं हर आहर आनयेत्यर्थः॥६॥