यः कोऽप्यात्मनः सकाशादन्यत्र पार्थक्येन ब्रह्म ब्राह्मणजातिं वेद मन्यते तमयथार्थदर्शिनं ब्रह्म ब्राह्मणजातिः परादात् पराकुर्यात् कैवल्यासंबन्धिनं कुर्यादयमनात्मस्वरूपेण मां पश्यतीति। अपराधात् – परमात्मा हि सर्वेषामात्मा।

क्षत्रं तं परादादित्यादि पूर्ववत्। उक्तं सर्वमनूद्य तस्याऽऽत्मानतिरिक्तत्वमित्युपसंहरति – इदं ब्रह्मेत्यादिना। यदयं योऽयमात्मा द्रष्टव्य इति प्रकृतः स एवेदं सर्वमुक्तमनुक्तं च न ततः पृथगस्तीत्यर्थः॥६॥